|
Presentación do libro “CAPELAS E ERMIDAS DA COSTA. A relixiosidade barroca en San Simón” de Sabela Figueira, J.L. Novo Cazón e Carme Pernas Sábado, 8 de agosto de 2009 – 19,45 horas
 Proseguindo co seu programa de extensión cultural, o Instituto de Estudios Chairegos de Vilalba presentou o sábado, 8 de agosto, na parroquia de San Simón da Costa, o libro Capelas e ermidas da Costa. A relixiosidade barroca en San Simón. Del son autores: Sabela Figueira Tenreiro, José-Luis Novo Cazón e Carme Pernas Bermúdez.
O libro fai o número 12 da colección Biblioteca Chairega e está patrocinado pola S.A. de Xestión do Plan Xacobeo, dependente da Consellerría de Cultura e Turismo da Xunta de Galicia. A través da historia das nove capelanías, fundadas en Costa entre os anos 1629 e 1760, os autores desta monografía amosan unha das formas da relixiosidade barroca, que, logo do sínodo do bispo Caja de la Jara, estendeuse por toda o a diocese de Mondoñedo e tamén polas abas da serra da Carba. Son manifestacións da mesma o valor das obras pías (as capelas, neste caso), o papel intercesor dos santos titulares destas capelas, o temor as lapas do Purgatorio, a celebracións de sufraxios polas almas que agardaban nel a entrada na Gloria ... O acto constou de dúas partes: a académica e a festiva. Desenvolveuse a primeira no interior da igrexa parroquial, abarrotada de público, correndo ao cargo: dos propios autores; de Cosme Insua, cura de San Simón; de Félix Villares Mouteira, delegado diocesano do patrimonio; e de Manuel Castro Santamariña, presidente do IESCHA. E deseguido, tivo lugar a segunda, consistente nun refrixerio, patrocinado por empresarios oriúndos de San Simón da Costa, que tivo lugar na escola habaneira, que se atopa nas inmediacións da propia igrexa. O IESCHA agasallou aos asistentes ao acto, a un por cada casa, cun exemplar desta obra, na que se reflicte unha parte moi significativa da orde social e do imaxinario das xentes que viviron en San Simón da Costa no transcurso da Modernidade.
|
