VII ANIVERSARIO DO PASAMENTO DE MANUEL MARÍA

PROXECCIÓN DA PELÍCULA "18 COMIDAS" DE JORGE COIRA
No Auditorio Municipal de Vilalba
Venres, 9 de setembro de 2011-20,30 horas

O INSTITUTO DE ESTUDIOS CHAIREGOS organiza o VII DÍA DA CULTURA CHAIREGA, que se instituiu na memoria de Manuel María, o autor do poemario "Terra Chá", auténtico creador literario desta comarca e do que se cumplen agora sete anos do seu pasamento.
Nesta ocasión o IESCHA, tentando de diversificar aínda máis o seu abano de actividades, ábrese ao mundo do 7º arte. E para elo nada mellor que ofertando ao público chairego a proxección dunha gran película, dun gran director chairego e interpretada por un gran actor chairego tamén: A película é “18 COMIDAS”; o director, Jorge COIRA; e un dos seus protagonistas, Luis TOSAR.
O acto levarase a cabo o vindeiro venres, 9 de setembro, ás 20,30 horas, no Auditorio Municipal de Vilalba,  e contará coa presenza e intervención do propio director Jorge Coira, do actor Luis Tosar, así como de Mª Luisa Rodríguez e Manuel Castro Santamariña.

Título: 18 comidas
Estreno: 19/11/2010
Productora: Tic Tac Producciones, Zircozine
Director: Jorge Coira
Guión: Jorge Coira, Araceli Gonda & Diego Ameixeira
Reparto: Luis Tosar, Esperanza Pedreño, María Vázquez, Cristina Brondo, Sergio Peris-Mencheta, Víctor Clavijo, Juan Carlos Bellido, Pedro Alonso

18 COMIDAS conta seis historias ao longo dun único día. Unha película que viaxa a través de dezaoito comidas que nos fan partícipes dalgúns destes momentos que poden cambiarche a vida.
Un música guía reencóntrase co amor da súa vida; dous borrachos almorzan cubatas con marisco; un home cociña, cociña e cociña para a muller que nunca chega; dous homes quérense, pero escóndense; unha cociñeira soña con ser cantante; unha moza quere o que un home non dá, e un camareiro morre por ela; un macedonio está perdido por desamor; unha parella de anciáns que xa llo dixo todo almorza, come e cea en silencio; ou unha parella de irmás enfrontadas por un sono.
Todas estas historias crúzanse ao longo dun día en 18 comidas. É unha viaxe polos sentimentos de todos os personaxes. 6 historias, 24 personaxes, un día, 18 comidas.
O feito de que as historias se crucen axudaranos a entender cada historia, cada personaxe, cada comida. E como estes personaxes verán as súas vidas cambiadas, cada un de diferente modo.
(http://www.18comidas.com) (http://www.todocriticas.es/pelicula/157/18-comidas/)

EXPOSICIÓN DE PINTURA
JESÚS TRASTOY

Inauguración
VENRES, 26 DE AGOSTO DE 2011 - 20,30 horas
AUDITORIO MUNICIPAL DE VILALBA
do 26 de agosto ao 16 de setembro

Coincidindo co inicio das festas de San Ramón e Santa María, o vindeiro venres, día 26 de agosto de 2011, ás 20,30 horas, na Sala do Auditorio Municipal de Vilalba, levarase a cabo a inauguración da Exposición de Pintura do artista vilalbés JESÚS TRASTOY, nun acto organizado polo Instituto de Estudios Chairegos.
A mostra, que poderá ser visitada dende o mesmo día 26 de agosto ata o 16 de setembro, en horario do Auditorio, está formada por 54 cadros distribuídos nas seguintes temáticas:
* Recantos Vilalbeses
* Persoeiros
* Varios
* Bodegóns
* Acuarelas
* Plumiñas
* Caricaturas
A linguaxe figurativa que Jesús Trastoy plasma nos seus cadros, utilizando técnicas diversas, aplícaa a temas moi variados. Con todo, sinte predilección polos recantos máis pintorescos e recónditos de Vilalba e doutros pobos mariñeiros, polos animais, por persoeiros cos que tivo algunha relación ...
Deu a coñecer a súa xa extensa obra a través de exposicións e certames. Participou nunha exposición colectiva no colexio lucense de Fingoi. Asistiu a certames en Burela,  en Begonte (con motivo do Belén), nos de maiores convocados pola Xunta de Galicia: no correspondente ao ano 2004 foi finalista con dúas obras, Escravos do móbil e As catro estacións; e no do ano en curso exhibiu outras dúas, A Santa Compaña  e Outono no Courel.

-------------------------------------------------------
JESÚS TRASTOY SAAVEDRA naceu na popular e histórica rúa da Porta de Cima de Vilalba o día 12 de setembro de 1941.
Nos anos da súa actividade laboral dedicou o tempo á construción e á telefonía, traballando en distintas empresas e en lugares moi espallados. Esta circunstancia impediulle desenvolver unha das actividades pola que sentía verdadeira paixón: a pintura.
Con todo e con iso, unha parte importante do seu tempo de lecer ocupouno na visita a exposicións de pintura, preguntándose a miúdo “como se podería facer algo como o que facían os que expoñían”.
Logo dunha intensa vida de traballo, chegoulle a prexubilación, e con ela a posibilidade de gobernar a súa existencia. Foi daquela cando se iniciou nas complicadas artes do pincel, asistindo a cursiños impartidos en Vilalba por Maximiliano López e Manolo Carballeira.
A partir de entón e xa instalado definitivamente na súa vila natal, foi “argallando á súa maneira” e desenvolvendo unha xa longa traxectoria como pintor na dourada idade da xubilación. Logrou converter esta nun auténtico xúbilo estético.

O INSTITUTO DE ESTUDIOS CHAIREGOS ORGANIZA A

POR TERRAS DE... A PASTORIZA

RUTA CAMIÑOS DO MIÑO: DE A PASTORIZA A FONMIÑÁ

O Instituto de Estudios Chairegos, como vén sendo habitual dende a súa fundación, organiza a  tradicional Ruta Chairega, que este ano alcanza xa a súa undécima edición.

Celebrarase o domingo, día 19 de xuño, percorrendo, nesta ocasión, terras de A Pastoriza, pola ruta CAMIÑOS DO MIÑO, que remata en FONMIÑÁ. A distancia total será de 15 km, aproximadamente.

Durante o percorrido da ruta, poderemos apreciar as fermosas paisaxes de Anllo, Baltar –coa súa prai fluvial-, o Castro de Sáa, Crecente e, ao remate, Fonmiñá.

Ao finalizar a ruta, haberá que repoñer forzas coa comida que se realizará nesta ocasión no restaurante Casa Horacio, do Chao de Pousadoiro.

A cuota que haberá que pagar será de 25 € por adulto e 5 € por menor acompañado (inclúe a comida e o autobús).

O traslado dos participantes nesta ruta farase en autobús dende Vilalba deica o inicio da ruta, na Pastoriza, saíndo das inmediacións da Pravia (Casa da Cultura) ás 9,30 horas e retornando pola tardiña.

Os/as interesados/as poden apuntarse contactando con algunha das persoas integrantes da Xunta Directiva do IESCHA.