|
ROBERTO VIDAL BOLAÑO E O TEATRO EN GALICIA |
|
 MESA REDONDA
“ROBERTO VIDAL BOLAÑO E O TEATRO ACTUAL”
O Instituto de Estudos Chairegos organiza para o vindeiro venres, día 10 de maio de 2013, ás 20:30 horas, na Casa da Cultura de Vilalba, unha mesa redonda que leva por título “Roberto Vidal Bolaño e o teatro actual”. Intervirán na mesma:
-Manuel Mª Lourenzo, actor, dramaturgo e director teatral
-Francisco Piñeiro, mestre e escritor
-Xosé Manuel Carballo, crego, escritor, ilusionista, humorista e animador cultural e social
-Mª Xosé Lamas, mestra e escritora
O acto enmárcase dentro da programación que, co gallo das Letras Galegas’2013, ten previsto levar a cabo o IESCHA durante o mes de maio e que contará así mesmo con representacións teatrais tanto par ao público en xeral coma para os máis pequenos. ROBERTO VIDAL BOLAÑO (Santiago de Compostela, 1950 – 2002)
É unha figura imprescindible para comprender a dimensión do Teatro Galego e, xa que logo, do noso sistema literario. Desde aqueles inicios nos anos setenta, coa mítica Xeración Abrente, ata o ano mesmo da súa morte, a produción literaria de Vidal Bolaño é constante e sempre orientada a armar un edificio teatral galego perdurable. Só uns meses antes do seu pasamento, no número 50 da revista A Trabe de Ouro publicouse o texto do seu monólogo Sen ir máis lonxe, que Méndez Ferrín cualificou como o seu testamento dramático. Ese mesmo ano a Real Academia Galega nomeouno Académico Correspondente.
É indiscutible a importancia da figura de RVB para o teatro nacional galego. Aínda que morreu novo (52 anos), Vidal Bolaño é, sen dúbida, o dramaturgo máis prolixo da historia da nosa literatura; mais non é só a cantidade da súa obra a razón da súa importancia, senón as múltiples calidades que os seus textos achegan durante toda a súa actividade.
Por enriba de todo, RVB foi un extraordinario escritor. Fixo literatura dramática a consciencia, con vontade de intervir no sistema literario galego, de dialogar con outras obras e autores, de apoiarse nos nosos clásicos (como Rosalía, Otero Pedrayo ou Cunqueiro, por exemplo) e na obra dos seus contemporáneos. Súa foi a translación aos escenarios do Percival de Méndez Ferrín, por exemplo, ou do Xelmírez de Cortezón ou da Rosalía de Otero Pedrayo. Era un escritor consciente da pertenza da súa obra a un sistema literario rico e dinámico, en constante desenvolvemento.
A súa obra merece ser revisitada nos escenarios e especialmente nos textos, porque coma os grandes autores de todos os tempos, Roberto Vidal Bolaño foi quen non xa de describir o seu tempo, senón, sobre todo, de transformar a súa época. O teatro galego sábeo ben, e con el, o noso sistema literario. (Real Academia Galega) |
|
|
 Nun acto literario e reivindicativo, que terá lugar na Libraría Couceiro
A historia do alemán de Camelle preséntase en Compostela, dez anos despóis da súa morte tras o desastre do Prestige.
Compostela acollerá o vindeiro sábado 4 de maio a presentación do libro Man, o alemán de Camelle, sobre a vida e obra de Manfred Gnädinger (1936-2002), o pintor e escultor xermano que viviu durante anos como un anacoreta en Camelle (Camariñas), na Costa da Morte. O acto, organizado conxuntamente polo xornal A Voz de Vilalba e o Instituto de Estudos Chairegos, terá lugar a partir das 13 horas na Libraría Couceiro de Compostela (Praza de Cervantes 6).
Man tratou de levar unha vida o máis simple e natural posible, elaborando esculturas ao aire libre preto da praia onde vivía e coidando o seu pequeno xardín. Naceu e pasou a súa infancia en Alemaña, procedente dunha familia de sete irmáns e estudou arte en Italia. Impartiu crases de arte en Suiza a persoas con problemas de integración social. O seu interese pola preservación do medio ambiente e a curiosidade por coñecer a costa galega conducírono á Costa da Morte. En maio de 1962 chegou a un Camelle inmerso nas festas patronais do Espírito Santo, como se recolle no libro. Desde aquel día aquel alemán solitario, educado, de bo aspecto e con certo aire de turista acomodado, instalouse para sempre no pobo. Durante o desastre do Prestige en novembro de 2002, a mancha de petróleo danou as súas esculturas. Crese que o Alemán deixouse morrer de melancolía e tristeza. A súa historia recóllese no libro Man, o alemán de Camelle (A Coruña, Galebook, 2012), con textos de Beatriz Maceda Abeleira e ilustracións de Laura Veleiro Suárez, que estarán presentes neste acto, que será conducido polo xornalista Moncho Paz. A edición -coidada e ben maquetada- trata de achegar aos máis novos a vida de Man, “para que manteñan vivo o seu espírito”. Beatriz Maceda Abeleira (A Coruña, 1963). Mestra de educación primaria, diplomada pola Escola Universitaria de Lugo e máster en Orientación Educativa. Adícase á docencia desde hai catorce anos e combina a súa profesión coa participación en congresos; tamén imparte cursos sobre ensino global. A literatura é outra das súas paixóns. Ten publicados relatos en revistas dixitais. Esta obra constitúe o seu primeiro conto infantil sobre un dos seus “heroes silandeiros”. Laura Veleiro Suárez (Xixón, 1970). Escritora e ilustradora, principalmente de libros infantís. Despois de rematar os seus estudos universitarios na Facultade de Xeografía e Historia da Universidade Complutense de Madrid, traballou xa en Galicia, no mundo editorial como redactora en Hércules de Ediciones. No ano 2010 publicou o seu primeiro proxecto persoal Nubeman baixo o selo de ECU Ediciones. As súas ilustracións e relatos abarcan temáticas e estilos moi diversos, desde a concienciación ambiental aos temas fantásticos e históricos. No seu traballo plástico emprega unha gran variedade de técnicas: acrílicos, pasteis, lápis de cores, tinta; mais sobresae en especial o seu gusto polas acuarelas e aguadas. O seu estilo reflicte a expresividade e o contido de cada proxecto único, dotándoo dunha forte naturalidade. |
|
|
 Venres, 26 de abril de 2013, na Casa da Cultura de Vilalba
PRESENTACIÓN DO LIBRO
“ALGUNHAS CASAS FIDALGAS DA TERRA CHÁ
E DOUTROS LUGARES.
Apuntamentos xenealóxicos e heráldicos” de JOSÉ MARÍA COIRA SANJURJO
Edición a cargo de José-Luis Novo Cazón
coa colaboración de Pepe Coira Nieto, Ana Mª Cuba Regueira e Manuel Lousa Rodríguez O Instituto de Estudos Chairegos organiza para o vindeiro venres, 26 de abril de 2013, ás 20:30 horas, na Casa da Cultura de Vilalba a presentación do libro de JOSÉ MARÍA COIRA SANJURJO “Algunhas casas fidalgas da Terra Chá e doutros lugares. Apuntamentos Xenealóxicos e Heráldi-cos”. A coordinación da edición correu a cargo de José-Luis Novo Cazón, coa colaboración de Pepe Coira Nieto, Ana Mª Cuba Regueira e Manuel Lousa Rodríguez.
O libro, publicado polo IESCHA, forma parte da Colección Biblioteca Chairega co número 21, e contou coa financiación da Área de Cultura-Vicepresidencia Primeira da Diputación de Lugo.
No acto intervirán: Manuel Castro Santamariña, presidente do IESCHA, José-Luís Novo Cazón, Pepe Coira Nieto, Ana María Cuba Regueira –coordinadores da edición- e María do Carme Lousa Gayoso, filla do falecido Manuel Lousa Rodríguez.
Genealogías é o título orixinal co que José María Coira Sanjurjo rotulou o manuscrito que se conserva no Museo Provincial de Lugo. Os coordinadores da súa edición pensaron que era máis acaído ao contido do mesmo este polo que finalmente optaron: “Algunhas casas fidalgas da Terra Chá e doutros lugares. Apuntamentos xenealóxicos e heráldicos”. Nel, efectivamente, deixou constancia do seu profundo coñecemento da xenealoxía chairega e debuxou con acerto moitas das pedras armeiras que campan dos muros dos pazos, casas grandes, capelas e enterramentos que fabricaron. José María Coira Sanjurjo Naceu en Trobo (Begonte) o día 27 de xullo de 1908, localidade chairega onde seu pai era médico. Foi o cuarto de once irmáns. Logo de pasar por Herbón, estudou a carreira de maxisterio, sendo mestre nacional e estudoso da xenealoxía e a heráldica da Terra Chá. Morreu en Lugo o 17 de agosto de 1977.
|
|
 Sábado, 20 de abril de 2013, no Auditorio Municipal de Vilalba PROXECCIÓN DA PELÍCULA “O APÓSTOLO” de Fernando Cortizo O Instituto de Estudos Chairegos convoca a todos os que o desexen a presenciar a proxección da película O APÓSTOLO, dirixida polo galego Fernando Cortizo, o vindeiro sábado, 20 de abril de 2013, ás 19 horas, no Auditorio Municipal de Vilalba. O acto enmárcase dentro do programa de colaboración do IESCHA co Instituto Santiago Basanta Silva nunha serie de actividades ao longo do mes de abril e maio . O Apóstolo é a primeira película de animación stop-motion estereoscópica realizada en Europa, un proxecto que arrancou en 2008 e que se realizou integramente en Galiza. Contou con Philip Glass para a creación da Banda Sonora e coa participación de técnicos provenientes de películas como “A Noiva Cadáver” ou “O Señor dos Aneis”. Máis de 200 persoas estiveron traballando durante dous anos para conseguir o máis alto nivel de animación. Trátase dunha película cunha calidade avalada por Festivais de todo o mundo, como o Festival internacional de cine de Moscú, Festival de Málaga, Festival de Sitges, Festival internacional de cine de Bogotá, Festival de animación EXPOTOONS de Bós Aires, principal festival de animación de Sudamérica, onde gañou o primeiro premio. Ademais, a película estivo nominada para os últimos Premios Goya no apartado de mellor película de animación. Sipnopse da película “O Apóstolo”: Un preso que acaba de fugarse do cárcere intentará recuperar un botín agochado anos atrás nunha solitaria e apartada aldea do Camiño de Santiago; pero o que alí vai atopar suporalle unha condena aínda maior da que fuxiu. Sinistros anciáns, estrañas desaparicións, espíritos, un peculiar sacerdote e ata o mismísimo arcipreste de Santiago cruzaranse no seu camiño nunha historia de suspense, humor e fantasía. |
|
| | << Inicio < Anterior 1 2 3 4 5 6 7 8 9 10 Seguinte > Final >>
| | Resultados 1 - 5 de 82 |
|
|
